لأول مرة الفنانة سماح أنور كوتش معتمد من امريكا “عيون حرة”

لأول مرة الفنانة سماح أنور كوتش معتمد في لقاء شيق مع “عيون حرة ” تتحدث عن العديد من الموضوعات الهامة، بما في ذلك تصريحاتها لآول مرة عن دراسة الكوتشنج في الولايات المتحدة الامريكية ،علي ايدي خبراء عالميين في هذا المجال مثل(جون جراي ،وبوب بروكتور ) وكيف اثرو في حياتها.بالاضافة الي ارئها عن الحياة والنجاح وحرب النوع بين الرجل والمرأة. وقدرتها على تحمل مصاعب الحياة ونشآتها في عائلة تعتمد على نفسها،وإيمانها بان التغيير اساسي في الحياة بالاضافة الي تصريحات، أثارت العديد من الجدل ،مثل عاداتها المختلفة في الاكل والشرب وعن اخر اخبارها الفنية .

بدآت الفنانة سماح انور حديثها ” لعيون حرة “معرفة نفسها بأنها ممثلة  وتابعت بشغف بأنها غير مؤمنة بالتخصص في الحياة ، وقالت : انا الطالب اللي ما بيتخرجش ابدآ ، ومن الناس المؤمنة ان مافيش حد بيخلص تعليم  كل ما بلاقي نفسي ماعنديش تمثيل بذاكر،وبعد الحادث اللي تعرضت له في حياتي ،حصلي تطورات كتير فا مكنش عندي تمثيل واللي كان بيتعرض عليا مكنش حلو ومكنتش مهتمة اشتغل

درست الكوتشنج في امريكا بعد الحادثة

وفيما تحدثت عن دراستها للكوتشنج وتابعت : انا بدأت اذاكر الكوتشنج ايام حادثتي،لأنه دى كانت فترة مظلمة جدآ في حياتي وكانت فترة سودا في الأول ومكنتش عارفة اتحرك حتى وكنت محبطة جدآ  الحمد للة الفترة دي انا قضيتها في امريكا واوربا امريكا 3 سنين و اوروبا بقى على فترات متقطعة سنتين تلاتة علشان العمليات اللي عملتها بس كنت في الفترة دي بذاكر بنفسي كتير جدآ علشان انا ابقى احسن ،وكنت عاوزة الحياة تخلص بقى لأن الحياة اللي انا اعرفها مش هتبقى موجودة

جون جراي وبوب بروكتور كان لهم دور كبير في دراستي للكوتشنج

استكملت حديثها عن الكوتشينج واشارت الى الفترة التي درست فيها بأمريكا قائلة لما روحت  امريكا كنت مجرورة اوي اشتري كتب واتعلم بنفسي فا اكتر كتب قريتها واكتر ناس اتبعتهم في الفترة دي كان دكتور جون جراي بالنسبة للعلاقات ودة حبيبي وصاحبي ومعلمي الحقيق بوب بروكتور ودة رجل بالنسبالي يعني المادة الخام للبزنس كوتشنج مع التعافي الشخصي.

كنت مهتمة اتواصل معاهم وانا هناك وكنت في امريكا ايامها واتواصلت على النت مع جون جراي وقولتلة انا قريت في الحكاية ومهتمة جدآ اتعلم، وانا من الشرق الأوسط و العلاقات عندنا بايظة وعاوزة اتعلم فا قالي العلاقات بايظة في كل حتة، وبعدين قولتلة انا حريصة اني اذاكر دة وابقى كوتش معتمدة فالعلاقات من عندك علشان عايزة افيد المكان للي انا فية ويبقى كارير بالنسبالي لأن الكارير بتاعي almost over انا عاوزة اعمل كدة و عاوزة اساعد وفعلا في خلال سنة ونص انا حصلت على الشهادة وكان ليا الشرف اني اشتغل في المؤسسة بتاعتة في امريكا

أرفض حرب النوع  بين الرجل والمرآة !

وعندما سئلت عن رأيها في العلاقات وعن الرجل والمرآة تابعت سماح انور بتعبير عن وجهة نظرها بأن كلمة المرآة دي انا موافقة عليها في حالة انك تقولي عليها اي واحدة  لأن موضوع الرجل والمرآة دي حكاية وهمية وانا مش عارفة مين اللي عملها وربنا خلقنا مع بعض مينفعش نقلب على بعض لأن كدة الدنيا هتتلغبط كلها ربنا عايزنا مع بعض مش بس في البني ادميين كل حاجة ربنا خالقها كدة وربنا عامل كل واحد كدة .

انا استسهل واقول انت الرجل اللي بيتكلم ضد المرآة،والمرآة ليها حقوق دة كلام فاضي، الرجل والمرآة دول بني أدم وموضوع واسع وكبير لكن حرب النوع دي انا ضدها خالص لأنها غبية وجاهلة وودت العالم لخناقات لا داعي لها البيوت الفرقة فيها اكتر من الإنسجام !

الإنسان نتيجة أفكارة !

وتابعت الحديث عن الإنسان وأفكارة بالقول: انا مش بعتبر اي حاجة بتحصل صعبة الا لو انا قولت عليها كدة لو صحيت من النوم وقولت دة يوم مقرف هيكون كدة – لأن انا كا بني أدم ربنا مديني قدرة كن فا يكون انا لما بقول حاجة هنا جوة بتكون فا بما انا عندي القدرة دي لية بقول حاجة صعبة انت بتقرر من جواك دة ابتلاء ولا لاء انت بتقول انا في مصيبة يبقى انت قررت تكون في مصيبة ومش هيبقى غير مصايب لكن انا لو قولت انا بفوت في حاجة مش لذيذة كدة كويس

انا مريت بمصاعب محدش يتصورها  بس انا بفكر بإيجابية وبفكر بشكل عملي لكن هقعد اعيط واقول انا مضايقة وبعدين وبعدين ! هيجي عليا وقت اقول خلاص هنعمل اية بقى طيب ما يلا نقول كدة دلوقتي حالا هنعمل اية  وبعدين انا متربية بالطريقة دي

تحملت مصاعب الحياة عشان اهلي ربوني اعتمد على نفسي

واسترسلت في الحديث : انا متربية في بيت اهلي فنانين واهلي ما كنوش موظفين وكانوا بيتشقلبوا كل يوم علشان يبقى في حلة على النار ، ومافيش دراما في الموضوع يعني اهلي مكنش حد فيهم بيبقى زعلان انة بيشقى او بيخرج من منطقة راحتة دة الطبيعي،احنا لازم نعمل حاجة علشان الدنيا بتاعتنا تتغير في بيتنا مكناش بنعتمد على حد غير نفسنا ومتربين انا واخويا من واحنا صغيرين

كنا في فريق السباحة في نادي الزمالك من سن 9 : 15 : احنا كنا ساكنين في شارع الجلاء في رمسيس وسط البلد جنب محطة مصر وكان ايام موقف الأتوبيسات جنبها والدي كان عندة عربية بسواق وولدتي كمان ومع ذلك كنا بننزل علشان تمرينات السباحة كنا ننزل 6 الصبح نركب اتوبيس 888 انا واخويا – نروح بية التمرين وكل واحد فينا معاة 5 صاغ ،نجيب بيها كوكاكولا ولكن بنتغدى مع الفريق وبنروح 8 بليل ، باتوبيس النقل العام ومتعودين ان دي حاجة مش عيب ومبنقولش ان بابا او ماما معاهم عربية بسواق هما مربوناش كدة لأن هما مش فاضيين عندهم تصوير طول الوقت ومشغولين ومسرح وسفر انا بقول دة كا مثال على ان مافيش مشكلة

التغيير اساسي في الحياة .

وبسؤالها عن التغيير الذي يحدث للإنسان وانة جزء اساسي من الحياة قالت : سماح أنور البني ادم لو قاوم التغيير بيطول المة بس لأن هو اختار انة يطول الأزمة  لأن التغيير حصل انا هبقى ضد لية يبقى انا كدة بفسد حياتي  الحياة يعني اية يعني يومي  من ساعة ما اصحى لحد ا انام  اللي مضايقك واللي بتحبة وكل حاجة لها اهمية لي لأنك صحيت الصبح لكن انت بعد الشر لو ما صحتش الصبح في 2 مليون كل يوم ما بيصحوش الصبح خالص يبقى كل اللي قالقني وخانقني لو مصحتش الصبح هيبقى لة قيمة لاء خالص ” اذن يبقى انا الحياة بقى ” طالما انا الحياة بقى يبقى تمشي زي مانا عايزة ..

العصبية والصراحة سبب مشاكلي .

واشارت سماح انور انها شخصية منفتحة اوي وتابعت : انا ماتعودتش اقول حاجاة عكس اللي انا حاسها دي بتسببلي مشاكل كتير الحكاية دي ، انا بحاول امرن نفسي وان انا اقلل الإهتمام شوية بالناس لأن الحكاي دي ساعات بتبقى خانقة دول الحاجتين اللي بشتغل عليهم واخليني في نفسي شوية وعاوزة ابطل اقول كل حاجة بصدق – بحاول افرمل الحاجتين دول مش اتخلص منهم لأنهم ميزتين هايليين بس مش للمشاركة

المرآة لا تواجهة تحديات وحياة الرجال اصعب واكثر تنافسية !

واستكملت سماح انو الحديث عن عالم الرجل وعالم المرآة، واكدت ان ما فيش تحديات بتواجهة المرأة – لأن المرآة دلوقتي في عصر بتتشغل وعندها اختيارات وكل حاجة اي ست او بنت مسلمة مصيرها لحد تاني دة اختيار – تقدر تغيرة في اي لحظة لكن اللي بتختار ما تطلقش علشان مش عارفة هتعيش منيين دة اختيارها لكن هي تقدر تشتغل وتعيش وكل حاجة هي مش” فلوطة يعني ” كلنا بنشتغل وبنشقى بمجهودنا وخلاص انا بقى عاوزة حد يصرف عليا دة اختيار بردة .

وانا مش بقول دة صح وغلط  انا بقول الصح ليا وده اختيار كل واحد ،انا شايفة ان الرجل العالم بتاعة اقسى واصعب من عالم الست بكتير عالم الرجالة في تنافس يا انا يا انت !!وفي غربة فظيعة ومافيهوش حميمية اوي وحتى الصداقات في لها شروط كدة فيها جفاف انا شايفة ان دة عالم صعب حد يعيش فية

اما عالم المرآة انا شايفة انة عالم لطيف لأن كلة مشاركة واهتمام وكلة راحة والست عندها قدرات ربانية اكتر من الرجل بكتير يعني الرجل بطاريتة بتفضى بسرعة مايقدرش يعمل مجهود جسدي طول الوقت بيتعب ولما بيتعب بيحتاج يشيل الفيشة لو متجوز ست الست عندها قدرات الرجل تخلى عنها بأعتبارها كائن درجة تانية، دي فكرة الرجل مش فكرة ربنا ولا الكون ولا المخلوقات الأخرى

النجاح مش فلوس والحياة غير إكسسوارات الحياة!

وتطرقت سماح انور في حديثها عن النجاح وتحدثت متسألة : هي فكرة النجاح بالنسبالك اية  ؟ فلوس اكتر ولا عربية احسن عنوان افضل ؟ هدوم ماضي عليها واحد؟ او اسم واحد على الجذمة بتاعتى ؟يبقى انا خلاص كدة اصبح ليا قيمة طالما عليها اسم الرجل دة.

لكن بأختصار شديد الناس مختلط عليها الحكاية في فرق بين الحياة يعني زي ما قولنا ان الأنسان هو الحياة لو صحي الصبح ماصحيش خلصت كل حاجة اذن وجود الأنسان هو الحياة والحاجة التانية هي اكسسوارت الحياة “يبقى في فرق بين الحياة واكسسوارات الحياة ” اي حاجة موجودة غير البني ادم تبقى اكسسوارات.

السوشال ميديا خلت الناس مهووسة باكسسورات الحياة : يعني انا لو ما لبستش حاجة سينية وماقولتش انا ساكنة فين ومعنديش طيارة خاصة ولمبورجيني ابقى فاشلة مين اللي قال كدة ! مين اللي قال كدة بردة انا …لأن انا قررت ان اللي عندة فلوس اكتر احسن مني الحكاية مش كدة هو احسن مني ماديآ بس ،وهنا دة اسمة مقارنة  وانا في ناس بسميها عبد المخ

ابني قالي جزء صغير من حياتك بيعملوا عليها افلام!! 

وكشف سماح انور” لعيون حرة ” عن حديث خاص مع ابنها وقالت : ابني كان بيكلمني من كام يوم عن حياتي وبيقولي لية ما تعمليهاش عمل فني انا قولتلة انا مش شايفة ان فيها حاجة تثير الأهتمام فا ابني قالي جزء صغير من حياتك بيعملوا عليها افلام، بس انا لازلت شايفة ان الخبرة هي الأهم بالنسبة لي .

بصور مسلسلين وعندي فيلم سينما مع احمد عز

وصرحت سماح انور عن اخر اعمالها الفنيية : انا حاليا بصور مسلسل بطن الحوت وهينزل في نوفمبر على شاهد  ومسافرة اعمل مسلسل نقطة سودا للمخرج احمد اسامة ، ومع احمد فهمي ناهد السباعي احمد بدير وفاء عامر نضال الشافعي  وعمل هيكون حلو جدآ وعندي فيلم سينما مع احمد عز واسر ياسين ،وفيلم تاني بس بعد رمضان اللي جاي علشان ظروف التصوير مع منى ذكي ومش هنتكلم عن الأسم دلوقتي، بس دي مشاريع مهمة بالنسبالي 

 العدو طول عمره خسيس وغزة مدينة الأبطال

أشارت سماح انور ما يحدث  في غزة وقالت : ان ما يحدث ما هو الا  جرايم حرب اكيد والإعتداء مالوش اي مبرر والعدو هيفضل عدو ومتقدرش تنتظر من العدو الا كل خسة لأنة معودنا على كلة لأنة خسيس بأختصار وغزة مدينة الأبطال من صغيرها لكبيرها والتضحيات اللي بيعملها الشعب الفسطيني كبيرة جدآ جدآ جدآ واي كلام هيتقال عليها هيكون اقل من التضحيات الحقيقية اللي لاناس بتشوفها وتابعت انا مش

الشعب والجيش المصري قدموا دمائهم للقضية الفلسطينية.

وختمت حديثها مؤكدة بأن مصر والمصريين بالاخص اكتر ناس حاربوا مع فلسطين حروب حقيقية يعني زي ما غزة بيروح منها شباب زي الورد مصر كمان ضاع منها شباب زي الورد واللي وقف مع فلسطين الشعب المصري والجيش المصري والجكومة المصرية من الأربعينات من قبل ما كلنا نتولد فالمصريين بذات حالة خاصة شوية لأن احنا قدمنا دمائنا كلنا الحقيقة سواء بالحرب او بالذهاب وكل حاجة.