حرة معناها حرة في تفكيرك , حرة تشوفي و تعرفي كل حاجة بتحصل حواليكي في العالم و تفكري ايه اللي عاجبك و مقتنعة بيه و تقرري ازاي ممكن تعمليه من غير ما تبقى نشاز عن المجتمع.  حرة يعني انك تعرفي  وتفكري و تقرري بحرية و مسؤلية. حرة يعني تكوني واعية انك جزء من مجتمع  و مجتمع ما بيرحمش حد كمان,  يعني انتي مش فرد عايش في المريخ تعملي اللي ييجي في مزاجك و تقولي (أنا حرة)

 الشطارة انك تعملي اللي انتي عايزاه و مقتنعة بيه بس من غير ما تكسري حواجز المجتمع كلها على دماغك. لان المجتمع كوحدة اقوى منك بكتير . صحيح ان الحواجز القديمة المتوارثة, اللي ما لهاش اساس من الصحة لازم تتكسر  عشان نعيش صح, بس لازم تتكسر واحدة واحدة و بينا كلنا مش بيكي لوحدك.

كلنا عارفين ان مجتمعاتنا بقت مريضة و ضعيفة دلوقتي. ضعيفة في فكرها زي ما هي ضعيفة في اقتصادها.  بس واجبنا كناس متعلمة نبتنا من أرضها اننا نعالجها مش نتخلي عنها, لأنها ببساطة لو ماتت , فدة معناه ان جزء مننا مات.

و العلاج الوحيد اللي هيداوي المجتمعات  حرة بتحاول تقدمه ليكي و هو التنوير و التوعية , التعرف على كل جديد حولينا, جديد في كل المجالات و كل الاتجاهات. التوعية و التنوير دلوقتي بقي ليهم طرق كتيرة غير القراءة, الناس  دلوقتي بتتعلم من فيديوهات اليوتيوب, و من المدونات , من الكتب المسموعة اللي ممكن تسمعيها و انتي بتطبخي او و انتي سايقة العربية بتوصلي الولاد. دة طبعا مش بيقلل اهمية القراءة اللي مفيش غنى عنها.

التنوير و التوعية في حرة  شاملين كل تفاصيل حياتنا, شاملين ازاي ممكن نهتم بصحتنا و ناكل اكل صحي و نلعب رياضة , كأسلوب حياة, شاملين ازاي ممكن نتعلم تكنولوجيا جديدة موجودة في الموبايلات اللي في ايدنا ببلاش او في الكمبيوترات اللي في بيوتنا و اللي ممكن يساعدك تلاقي شغل و تقدمي على شغل او توظفي ناس , وانتي قاعدة في مكانك .

 في نسبة كبيرة من الطبقة المتعلمة اللي هما اقل من نص المجتمع , لسا بيتعاملوا مع الايميلات و الوورد الاكسل على انها اختراعات حديثة و رفاهية, و بيتعاملوا مع النت , اللي كتير مننا قاعد قدامها  ليل و نهار عشان يحط صور  علي الانستجرام و الفيسبوك, نفس الوقت اللي بنقعد فيه على النت , او حتي نصه , ممكن نستغله صح لانه  بيوفر لنا كورسات مجانية   بطريقة سهلة و جذابة ,ممكن تطور مهاراتنا وفيديوهات تشرح لنا اي حاجة عايزين نفهمها.

حرة هتساعد انه يكون لنا دور أننا نرتقي بالذوق العام و نتعلم نلبس اللي بيليق علينا و متماشي مع أدياننا و مناسب لاجسامنا من غير ما نصرف اي مليم ازيد من اللي بنصرفه على اللبس لان ببساطة مظهرك هو عنوانك , و اللي بيفرق في اللبس هو الذوق مش الفلوس.

 العالم حوالينا بيتقدم و احنا قاعدين نتفرج و ننتقد , و بالتالي بنرجع لورا !

حرة عايزاكي تبقي حرة من كل قيد يمنعك تتقدمي و تفكري,  و تقرري بنفسك الاسلوب اللي انتي عايزاه لحياتك و حياة ولادك و حياة بلدك. الحرية  هي حرية المعرفة و الاطلاع و القرار ما هياش ابدا الاستهتار. اعرفي و فكري و قرري عاجبك الكلام دة و لا مش عاجبك, و هتساعدي بلدك بدور ايجابي و لا هتقرفي من بلدك عشان هي عالم تالت! و تاني هالخص و اقول باختصار :

الحرية معلومة , الحرية أفكار, الحرية قرار.  و في حرة ( اعرفي و فكري و قرري)